Nais foon diling

törsdi, di 26ste önj e ismoune

Kil
Slaswik-Holstiins busekjarls gunge önj e tukamst eefter naie räigle aw jåcht. E loondäi önj Kil beslüütj änjörsne ma e stime foon CDU än FDP en nai jåchtrucht. E opositsjoon stimd slin apiinj. Eefter har miining åchtet et nai rucht ai nooch aw e schööl foon diirte än natör. Et tiint bloot en åltens üüljmoudsch tånken jåchtlobby, miinjt Marlies Fritzen foon e gräine. E CDU-moon Hartmut Hamerich wised da forsmite tubääg. Önjt nai rucht jeeft et maning faire oueriinjkamste twasche jåcht än tiirschööl, miinjd uk loonwirtschapsministerin Juliane Rumpf.
Foole strääwen wörd amt schiitjen ma bliimunitsjoon. Följk mötj et uk widerhaane, bloot ai aw wååderföögle. En ferboot foon bliimunitsjoon, as foon e opositsjoon fordid, laanit suurt-gööl ouf. Deerbai as et gafti ütwirken foon blii nooch bekånt, betuund Flemming Meyer foon e SSW.
Bliifergafting as iinj foon e wichtiste düüsuursååge foon t.b. siioodlere.

Ahrensburg
Bai e natörschöölferiin Jordsand än san formoon Uwe Schneider heet e politii et hüs döörseecht. Dåt beruchtet et Hamburger Abendblatt diling. Et gungt am ferüntrouen foon feriinsgiilj. Beschülid wårt e formoon Uwe Schneider, wat uk önj dåt hüs booget. Da unersäkinge gunge tubääg awt önjwisen foon en priwootpersoon, sü e ofitsjäl ütkunft foon e stootafkootschap.
Di feriin Jordsand wörd 1907 grünläid än årbet intwasche sunt mör as hunert iir fort schöölen foon siiföögle än natöör bai Weest- än Aåstsiie. Önj Nordfraschlönj as e feriin besuners aktiif än betroit t.b. da latje hålie än e Hauke Haien Kuuch.

Wääder, wååder än moune
Di wunter as intäägen önj Nordfraschlönj. Diling as et döörwüksen än püsti, ouers dröög. Da temperatuure kaame bloot tumadi for en kort schöör knååp ouer e froostpunkt. Nåchtling fålt et termomeeter aw minus twäär grood än et fålt möre stüne lung snii. Di blaft uk jarst iinjsen laden, sü dåt huum mjarne ma ferkiirs-behaneringe räägne schal. Mjarne kaame da temperatuure ai rucht ouer e froostpunkt än lade sü bai minus twäär bit nul grood. Diling wait en koulen, püstien win üt et söödååsten, tum diilj ma stormbööe, ouf mjarne dan ai mör gåns sü püsti.
Da näiste biise tunge huuchwååder önj Doogebel hääwe we di eeftermadi am 23 minuute ouf fjouer än dan wi nåchtling am kort ouf huulwe fiiw.
Di moune namt tu.

Än tuleest nuch üüs spräkeuurd for diling
Huum mötj e döiwel ai suurter mååge, as´r as.

En tiinjst foon e
FRIISK FORIINING
www.friiske.de

Download MP3 (3 MB)